لو كان كورونا رجلاً لقتلته …
دروس قاسية تعلمتها من تجربتي ودفعنا ثمنها دم وارواح :
تعلمت ما اهمل ولا فرصة ولا لحظة اقضيها مع اهلي واقرب الناس الي لو قد ما كون مشغولة .تا ما اوصل لنهار اتمنى شوفن فيه لو لحظة واغمرن وشم ريحتن لو لثواني وما لقين …
….Never take your beloved ones for granted
اكتشفت الصديق من العدو وعرفت مين فعلا حقيقي ومين كان مزّيف وما كنت ملاحظتن ..
عرفت انو ما في مثل شعبي غلط متل : “عين المحزون ضيقة “. ما فيني انسى كل اللي قصروا بهل الموضوع وبيعرفوا حالن منيح بس يتذكروا انو الدنيي دوارة…
وما فيني انسى كمان كل اللي ساندوني بتعزيتهم وتضامنهم ومواساتهم وسؤالهم المتواصل عني وحتى صديقاتي اللي ما تركوني وعملو برنامج طبخ يومي لمدة شهر لانهم كانو عارفين اني غير قادرة على الدخول الى المطبخ بسبب المرض والفاجعة ..
قديش حلوة المحبة لما تكون من القلب وحقيقية …
ما فيني ما اسأل نفسي كل يوم ليش انا ؟ ليش نحنا؟؟؟ اللي بدنا نتعرض لكل هالظلم والقهر والخسارة ؟؟؟
ما فيني انسى ٣ سبوت تاريخية سود احلك من الظلام …
كل ما بسمع والدي عم يسأل عن ابنو يومياً وعم يبكي بدو ينزل يشق عليه بالمستشفى لان ما منسترجي نخبرو بروح فيا انو ريشار خيينا راح…راح
كل ما سألني وهيدا كل يوم بحس خنجر انغرز بقلبي… كيف هالمجرمين اللي دمروا عيلة وخسروا اب ابنو الشاب متروكين هيك بلا محاسبة حتى الان !!!؟؟؟
ما فيني انسى الممرض المعدوم الضمير البلا انسانية يللي تجاهل نداءات اخي مريض كورونا وتركه كأنه مصاب بالجرب ويللي كل الشعب اللبناني سمعوه على كل الشاشات عم ينتهرو في اخر رسالة صوتية لي : مع مين عم تحكي ؟ هالوحش البشري هو عار على مهنة التمريض الانسانية عماد ملاعب في مشفى الموت البلفو يللي عدالة الانسان حاسبتو قبل القضاء لما اجمع الرأي العام اللبناني على تصرفو اللااخلاقي واللاإنساني والناس كلها تشهد على ذلك وانصدموا وما صدقوا شو سمعوا معقول في وحوش بشرية تكون مسؤولة عن ارواحنا ونحنا مرضى ضعاف لا حول لنا ولا قوة ؟!! .
تعلمت كون قوية من الضعف واوقف عا اجريي بس اتطلعت لقيت نفسي مسؤولة امام عيلتي وامام الرأي العام ما فيني اخذلهم وهني ناطرين يتحقق العدل ولو لمرة واحدة!!!
لن استسلم ولن اسكت طول ما انا مقتنعة ان اللي صار جريمة ما بينسكت عنها وانه يجب محاسبة المقصرين في مسلسل الاستهتار هذا من المستشفى للممرضين للاطباء ..علها تكون امثولة ورادع ، يحميي ضحايا ابرياء ما الن ذنب غير انهم مرضى كورونا في لبنان …. #العدالة_لريشار
الإعلامية ريتا واكيم الحاج